ⵜⵉⵎⵥⵕⵉⵜ ⵜⴰⵙⵜⵕⴰⵜⵉⵊⵉⵜ ⵏ ⵜⴽⵏⵏⴰⵡⵜ ⵏ ⵓⵙⵍⵎⴷ

ⵜⴱⴷⴷⴰ ⵜⵎⵥⵕⵉⵜ ⵜⴰⵙⵜⵕⴰⵜⵉⵊⵉⵜ ⵏ ⵜⴽⵏⵏⴰⵡⵜⵏ ⵓⵙⵍⵎⴷ 2015-2030, ⴳ ⵉⵙⵙⴽⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ ⴰⵚⵕⵚⵚⴰ ⵏ ⵜⵉⵏⵎⵍ ⵜⴰⵜⵔⴰⵔⵜ, (ⵜⴱⴷⴷⴰ) ⵅ ⵓⵙⵙⵓⵎⵓ ⴷ ⵉⵙⴽⵉⵍ ⵏ ⵉⵍⴰⵏ ⴷ ⵓⵙⵡⴰⵔ ⵏ ⵜⵕⵡⵉ ⵉ ⴽⵓ ⵢⴰⵏ , ⴷ ⵓⵙⴽⴽⵉⵔ ⵏⵏⵉ ⴷ ⵢⵓⵙⴰⵏ  ⵉ ⵡⴰⵏⴰⵡ ⴰⴱⵉⴷⴰⴳⵓⵊⵉ, ⴷⴷⴰ ⵉⴳⴰⵏ ⴰⵎⵓⴷ ⵏ ⵜⵡⵓⵔⵉ ⵏ ⵜⵉⵏⵎⵍ ⵙ ⵎⴰⵕⵕⴰ ⵉⴼⵔⴷⵉⵙⵏ ⵏⵏⵙ, ⵉⴳ ⵉⵍⵎⵎⴰ ⴰⵡⴷ ⵜⴰⵔⵙⵍⵜ ⵏ ⵓⵙⴰⴳⴳⵯ  ⵙ ⵜⵙⵖⴰⵏ ⵏⵏⵙ, ⴳ ⵓⵙⴳⵎⵉ ⴷ ⵓⵙⵍⵎⴷ ⴷ ⵓⵙⵎⵓⵜⵜⴳ.

ⵙ ⵎⴰⵏⴰⵢⴰ, ⵜⵙⵡⴰⵏⴳⵎ ⵜⵎⵥⵕⵉⵜ ⵜⴰⵙⵜⵕⴰⵜⵉⵊⵉⵜ ⵏ ⵜⴽⵏⵏⴰⵡⵜⵏ ⵓⵙⵍⵎⴷ, ⴳ ⵓⵙⵜⴰⵢ ⵏ ⵓⵖⴰⵡⴰⵙ ⴰⵏⴰⵎⵓⵔ ⵓⵙⵉⴷⴼ, ⵙ ⵉⴼⵔⴷⵉⵙⵏ ⵉⵏⵎⵏⴰⴹⵏ ⴳ ⵓⵙⵡⵉⵔ ⵏ ⵜⵣⵓⵏⴰ ⴷ ⵉⵙⵓⴽⴰ ⴷ ⵉⴳⵊⴷⴰ ⵏ ⵜⵖⵓⵔⵉ, ⴳ ⵉⵎⵉⵔⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ. ⵉⴱⴷⴷ ⵎⴰⵢⴰ ⵅⴼ ⵓⵎⵢⴰⵖⴷ ⵓⵙⵎⴰⴷ ⵏ ⵜⵎⵜⵜⴰⵡⵉⵏ ⴷ ⵉⵥⵍⴰⵏ, ⴷ ⵜⵙⵖⵏⵜ ⵏ ⵓⵙⵖⵍ, ⴷ ⵜⵕⵡⵉ ⵏ ⵓⵙⵡⴰⵍⴰ ⴰⵙⴳⵎⴰⵏ, ⴷ ⵓⵙⵏⵏⴷ ⵅⴼ ⵓⵙⴰⵜⵉ ⴰⵙⴰⵖⵓⵍ ⴷ ⵓⵡⵙⵙⴰⵏ ⴳ ⵓⵜⵡⴰⵍ ⵏ ⴽⵓ ⵉⵎⴰⵔⵔⵏ ⵏ ⵓⵙⵍⵎⴷ ⴰⵏⵎⵍⴰⵏ ⴷ ⵓⵏⴰⴼⵍⵍⴰ ⴷ ⵓⵇⴱⵓⵔ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ, ⴰⴽⴷ ⵏ ⵓⵔⴰⵄⴰ ⵏ ⵜⵥⵍⴰⵢⵉⵏ ⵏ ⴽⵓ ⴰⵙⵡⵉⵔ ⴷ ⵓⴷⵖⴰⵔ ⵏⵏⵙ ⴳ ⵓⵣⴰⵣⵓⴰⵏⵎⵍⴰⵏ ⵉ ⵉⵏⵍⵎⴰⴷⵏ ⴷ ⵜⵙⵖⵏⵜ ⵏⵏⵙ ⵜⴰⵙⴳⵎⴰⵏⵜ.

ⴳ ⵎⴰ ⵉⵥⵍⵉⵏ ⵉ ⵜⴰⵔⵔⴰⵢⵉⵏ  ⴷ ⵉⵖⴰⵡⴰⵙⵏ, ⵜⵙⵙⵓⵎⵓⵔ ⵜⵎⵥⵕⴰ ⵜⴰⵙⵜⵔⴰⵜⵉⵊⵉⵜ ⵉ ⵜⴽⵏⵏⴰⵡⵜⵏ ⵓⵙⵍⵎⴷ, ⴰⵣⵣⵔⴰⵢ ⵅⴼ ⵜⴱⵔⵉⴷⵉⵏ ⴷ ⵉⵖⴰⵡⴰⵙⵏ ⴷ ⵜⵖⴰⵔⴰⵙⵉⵏ ⵜⵉⴱⵉⴷⴰⴳⵓⵊⵉⵢⵉⵏ,ⵙ ⵓⵙⵀⵡⵏ ⵏ ⵜⴰⵔⵔⴰⵢⵉⵏ ⴰⴷ ⴷ ⵓⵙⵎⵢⴰⵏⴰⵡ ⵏⵏⵙⵏⵜ, ⴷ ⵓⵙⵡⴰⵍⴰ ⵏⵏⵙⵜ ⵙ ⵓⵚⴽⵓ ⴰⵡⵏⴳⵉⵎ ⵏ ⵓⵏⵍⵎⴷⴰ ⴷ ⵜⵏⵍⵎⴰⴷⵜ, ⴷ ⵜⴳⵎⵉ ⵏ ⵜⵙⵏⵉⴳⵉⵜ ⵏ ⵜⵏⵥⵉ ⴷ ⵓⵙⴼⵙⵉ ⴷ ⵜⵙⵥⵉⵜ ⴷ ⵓⵙⵡⵉⵏⴳⵎ ⵓⵥⵉⵎ ⵏⵏⵙⵏ . ⵜⴱⴷⴷ ⵜⴰⵡⵏⴰ ⵏ ⵜⴱⵔⵉⴷⵉⵏ  ⴷ ⵜⵉⵡⵉ ⵜⵎⵥⵕⴰ  ⵅⴼ ⵓⵏⵀⵍⵍⴰ ⴳ ⵓⵏⵍⵎⴰⴷ, ⴰⴼⵔⵓⵅ ⴷ ⵜⴼⵔⵓⵅⵜ, ⵉⴳⴰⵏ ⴰⵡⵜⵜⴰⵙⵏ ⵜⵎⵀⵍⵜ ⵜⴰⴱⵉⴷⴰⴳⵓⵊⵉⵜ, ⵙ ⵓⵙⵙⵔⵇⴱ ⵏⵏⵙⵏ ⵉ ⵜⴳⵎⵉ ⵏ ⵜⴷⵍⵙⴰ ⵏ ⵓⵥⵉⵎ ⴷ ⵜⵙⵏⵜⴰⵢⵜ ⴷ ⵜⵎⴰⴳⵍⴰⵢⵜ, ⴷ ⵜⵎⴷⵔⴰⵡⵜ ⴷ ⵉⵇⵇⴰⵏ ⵓⵙⵉⴷⴼ ⴷ ⵓⵙⵎⴰⴳⵍ  ⵏⵏⵙⵏ ⴳ ⵜⵡⵉⵣⴰ, ⵙⵉⵎⵓⵙⵙⵓⵜⵏ ⵏ ⵓⵔⵣⵣⵓ, ⴷ ⵉⵙⵍⵍⵡⵉ  ⴷ ⵜⵎⴷⵔⴰⵡⵜ ⴳ ⵓⵙⵡⵓⴷⴷⵓ, ⴷ ⵓⵎⵛⴰⵛⴽⴰ ⴷ ⵢⵓⵙⴰⵏ ⵏⴳⵔ ⵜⵓⵙⵙⵏⴰ ⵜⵉⵎⵉⵥⵉⵕⵜ ⴷ ⵜⵓⵙⵙⵏⴰ ⵜⵉⵎⵙⴽⵔⵜ, ⴷ ⵓⵙⴷⵓⵙ ⵏ ⵜⴷⵍⵙⴰ ⵜⴰⵏⴰⵎⵓⵔⵜ ⵙ ⴽⵓ ⵉⴼⵔⴷⴰⵙ ⵏⵏⵙ, ⴷ ⵓⵙⴱⵓⵖⵍⵓ ⵏ ⵜⵉⵍⵉⵜ ⵏⵏⵙ ⴳ ⵉⵖⴰⵡⴰⵙⵏ ⵉⵏⵎⴰⵍⴰⵏⵏ.  

ⴳ ⵜⴳⵉⵔⴰ, ⵜⵜⵙⵜⴰⴼ ⵜⵏⵜⴰⵎⵜ ⵏ ⵜⵎⵥⵕⴰ ⵜⴰⵙⵜⵔⴰⵜⵉⵊⵉⵜ ⴰⵣⵔⵔⴰⵢ ⵏ ⵓⵙⵡⵓⴷⴷⵓ ⵏ ⵡⴰⴽⵓⴷ ⴰⵏⵎⴰⵍⴰⵏ ⴷ ⵓⵙⵀⵡⵏ ⵏ ⵓⵛⴽⵓⴽⵍ ⵏ ⵉⵖⴰⵡⴰⵙⵏ ⴷ ⵜⴽⵏⵏⴰⵡⵜ ⵢⵓⵎⴰⵏ ⵉ ⵓⵏⴳⵔⴰⵡ ⵏ ⵓⵙⵖⴰⵍ ⴷ ⵉⵔⵉⵎⵏ ⴰⴽⴷ ⵢⵉⵡⵉⵣ ⵅⴼ ⵓⵙⵙⵔⵇⴱⵏ ⵓⵎⵓⵔⵙ ⵙ ⵉⵙⴱⴷⴰⴷⵏ ⵏ ⵓⵙⵓⴳⵔ.

ⵉ ⵓⴳⴳⴰⵔ ⵏ ⵓⵎⵍⴰⵏ, ⴰⴳⴳⵯⴰⵜ ⵏⵏ ⴰⵙⵉⵜⵏ ⴰⴷ:

- ⴰⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵙⴳⵎⵉ  ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ;

- ⵜⴰⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ;

- ⵜⴰⵎⴰⵡⴰⵙⵜ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ;

 - ⴰⵙⵉⵜ ⴰⵏⴰⵎⵓⵔ ⵏ ⵓⵙⵡⴰⵍⴰ ⴰⵣⵣⵓⵍⴰⵏ.